BATIMARSO

A Martellago festeggiamo il Batimarzo ogni ultimo giorno di febbraio.

A l'epoca de ła Serenìsima Republica, el Cao de ano, invese che al 1° de genaro, come 'l xera previsto da 'l całendario giulian e dopo da queło gregorian, el cascava el 1° de marso. Sta tradision, ła par che ła vegna da l'antigo całendario doparà da i Romani prima de Giulio Cesare, całendario che el faxéa scominsiar l'ano da 'l méxe de marso (e defati in sta maniera i mesi de setenbre, otobre, novenbre e diçenbre i vien a èsar efetivamente i méxi numaro sete, oto, nove e diexe come 'l dixe el nome). Par no far confuxion, i Veneti de na òlta in parte a ła data i ghe scrivéa more veneto, overosìpia, leteralmente, "a ła maniera Veneta". Donca, ła data, par dir, de 'l "14 febraro 1703", a Venesia ła deventava "14 febraro 1702 more veneto", parché el febraro 'l xera efetivamente l'ultimo méxe de l'ano vecio, e el 1703 el scominsiava soło in marso.

Ła festa del Bati Marso ła capitava apunto inte i ultimi dì de l'ano, e ła prevedéa de 'ndar in giro par łe strade smacando su cuerciołi, pegnate e altri strumenti muxicałi "fati in caxa" faxendo un gran bacàn, co l'intento de far scapar via l'inverno e el fredo e propisiarse l'arivo de ła beła stajon, par poder scuminsiar i laori 'gricołi.

Inte i ultimi ani, çerti grupi culturałi i xe drio çercar de far rivivar el Capodano Veneto ri-scuerxendo ła vecia tradision, che col pasar de i ani ła xera drio 'ndar in desmentegon.